«Халық Кеңесі» сайтында «Халық дауысы» бөлімі ашылды

Halyq-kenesi.kz сайтында оқырман мен редакция арасындағы байланысты нығайтуға арналған «Халық дауысы» бөлімі қосылды.
Жаңа бөлім өңірлердегі шешімін таппаған мәселелерді редакция назарына жеткізуге арналған. Мұнда әлеуметтік жағдай, тұрғын үй-коммуналдық шаруашылық, инфрақұрылым, денсаулық сақтау, білім беру, экология және құқықтық мәселелер туралы хабарлауға болады.
Қазақ және орыс тілдерінде әзірленген нысанда мәселенің санатын, өңірін, тақырыбын және толық сипаттамасын көрсетуге, фото немесе құжат тіркеуге арналған өрістер бар. Редакция қажет болған жағдайда хабарласуы үшін аты-жөні мен байланыс деректері сұралады. Аты-жөнін жариялауға келісім бөлек беріледі және міндетті емес.
Редакцияға жолданған ақпарат тексеріліп, оның негізінде журналистік материал әзірлеу немесе тиісті мекемеге редакциялық сауал жіберу мүмкіндігі қаралады.
«Халық дауысы» — бұқаралық ақпарат құралының редакциясымен байланысу бөлімі. Ол мемлекеттік органдарға ресми өтініш беру сервисін алмастырмайды.
Жаңа бөлімге сайттың жоғарғы жағындағы «ХАЛЫҚ ДАУЫСЫ — Мәселе жолдау» батырмасы арқылы өтуге болады.


