Халық Кеңесінің мүшесі Увайс Джанаев «Ел бірлігі» орденімен марапатталды
Фотосурет: ife09.kzҚазақстан Халық Кеңесінің мүшесі, Қарағанды облысындағы «Вайнах» шешен-ингуш этномәдени бірлестігінің төрағасы Увайс Джанаев мемлекеттік наградаға ие болды. Президент Қасым-Жомарт Тоқаевтың Жарлығымен оған «Ел бірлігі» ордені берілді, деп хабарлайды halyq-kenesi.kz ақпарат агенттігі.
23 қазанда Республика күні қарсаңында елдің әлеуметтік-экономикалық, мәдени және рухани дамуына, қоғамдық келісім мен халықтар арасындағы достықты нығайтуға үлес қосқан азаматтардың мемлекеттік наградалармен марапатталғаны жарияланды.
Олардың қатарында Қазақстан Халық Кеңесінің мүшесі Увайс Джанаев бар.
Ол 2010 жылдан бері Қарағанды облысындағы «Вайнах» шешен-ингуш этномәдени бірлестігін басқарып келеді. Қоғамдық қызметінде этносаралық татулықты нығайтуға, ұлттық мәдениетті сақтауға, жастар тәрбиесі мен қайырымдылық бастамаларына ерекше көңіл бөліп келеді.
Увайс Джанаев бұған дейін Қазақстан халқы Ассамблеясының «Бірлік» Алтын медалімен марапатталған.
2026 жылдың қыркүйегінде ол Қазақстан Халық Кеңесінің құрамына енді. Увайс Джанаевтың Кеңес мүшесі ретіндегі жеке парақшасы halyq-kenesi.kz ақпарат агенттігінің арнайы бөлімінде орналастырылған.
«Ел бірлігі» ордені – оның қоғамдық келісімді нығайту жолындағы көпжылдық еңбегінің мемлекеттік деңгейде мойындалуы.
Айта кетейік, бұл орденге Алматы қаласындағы Түрікмен қоғамдық-мәдени орталығының құрметті төрағасы Г. Аннакулиева, Қазақстандық немістердің «Возрождение» бірлестігінің атқарушы директоры Д. Редлер және Tamos Space School мұғалімі Д. Ромащенко да ие болды.


