Халық Кеңесінде айтылған міндеттер Президент бақылауында: Қарин Тоқаевқа есеп берді

Қазақстан Халық Кеңесінің алғашқы сессиясында айтылған міндеттер енді жай саяси мәлімдеме деңгейінде қалмайды. Олардың орындалуы елдің ішкі саясаты бойынша Президентке берілетін есептің жеке бағытына айналып отыр. Вице-Президент Ерлан Қарин Мемлекет басшысы Қасым-Жомарт Тоқаевқа Халық Кеңесі мен Құрылтай алаңдарында көтерілген бастамалардың қалай іске асырылып жатқаны жөнінде баяндады.

Мемлекет басшысы Вице-Президент Ерлан Қаринді қабылдап, ішкі саясаттың басым бағыттарын жүзеге асыру жөніндегі есебін тыңдады, деп хабарлайды halyq-kenesi.kz ақпарат агенттігі Ақорданың баспасөз қызметіне сілтеме жасап.

Кездесуде Президент тапсырмаларын орындау және Мемлекет басшысының бастамаларын ілгерілету мәселелері қаралды.

Оның ішінде бірінші шақырылған Құрылтайдың алғашқы сессиясында және Қазақстан Халық Кеңесінің бірінші сессиясында көтерілген міндеттерді жүзеге асыру барысына ерекше назар аударылды.

Қазақстан Халық Кеңесі – Қазақстан халқының мүдделерін білдіретін жоғары конституциялық консультативтік орган. Оның құқықтық мәртебесі мен өкілеттіктері туралы толығырақ осы жерден оқуға болады.

Конституциялық құндылық қағазда қалып қоймауы керек

Ерлан Қарин Президентке конституциялық құндылықтарды түсіндіру және насихаттау бойынша атқарылып жатқан жұмыстар туралы баяндады.

Бұл мәселе соңғы күндері Халық Кеңесінің күн тәртібінде де алдыңғы қатарға шыққан.

Батыс Қазақстан облысында өткен «Жаңа қоғамдық этика: мәдениет, әдеп, әдет» республикалық форумында Конституция қағидаттарын тек түсіндіру жеткіліксіз екені, олар азаматтың күнделікті мінез-құлқы мен қоғамдық мәдениетіне айналуы қажеттігі айтылды.

Halyq-kenesi.kz бұл мәселені бұған дейін «Халық Кеңесі әдеп дағдарысын көтерді» атты материалда кеңінен талдаған болатын.

Президентке берілген есепте осы бағыттың жеке қарастырылуы қоғамдық этика мен конституциялық құндылықтар тақырыбының енді тек форум мінберінде емес, нақты мемлекеттік саясат деңгейінде жалғасатынын аңғартады.

«Таза Қазақстан», «Заң мен тәртіп», «Адал азамат»

Вице-Президент сондай-ақ:

– «Таза Қазақстан» жобасын жүзеге асыру;
– жаңа қоғамдық этика қалыптастыру;
– «Заң мен тәртіп» қағидатын ілгерілету;
– «Адал азамат» бірыңғай тәрбие бағдарламасын енгізу бойынша атқарылған жұмыстарды баяндады.

Бұл бағыттардың бәрі бір-бірінен бөлек науқандар емес, қоғамдық жауапкершілік пен азаматтық мәдениетті қалыптастыруға бағытталған ортақ саясат ретінде қарастырылып отыр.

Мәселе енді ұранның көптігінде емес, оның азаматтың күнделікті өміріне қаншалықты әсер ететінінде.

«Таза Қазақстан» тазалық акциясымен ғана шектеле ме? «Заң мен тәртіп» азаматтың құқықтық мәдениетіне айнала ма? «Адал азамат» мектеп бағдарламасының атауы болып қала ма, әлде жаңа қоғамдық мінез қалыптастыра ала ма?

Нәтиже осы сұрақтардың жауабымен өлшенбек.

Этносаралық келісім де негізгі бағыттардың қатарында

Мемлекет басшысына этносаралық келісімді нығайту мәселесі жөнінде де ақпарат берілді.

Бұл бағыт Қазақстан Халық Кеңесінің негізгі міндеттерімен тікелей сабақтас.

Кеңес құрамына этномәдени бірлестіктер, азаматтық қоғам, мәслихаттар мен қоғамдық кеңестер өкілдері кірген. Сондықтан қоғамдық келісімнің беріктігі тек мемлекеттік органдардың жұмысымен емес, осы өкілдердің нақты шешімдер қабылдау үдерісіне қаншалықты қатыса алатынымен де өлшенеді.

Бұған дейін halyq-kenesi.kz «957 бірлестік, 126 мүше: Халық Кеңесі халықтың үнін шешімге жеткізе ала ма?» деген материалында осы мәселені көтерген еді.

Мемлекеттік ақпараттық саясат та Президент назарында

Кездесуде балалардың құқықтары мен мүдделерін қамтамасыз ету және мемлекеттік ақпараттық саясатты жетілдіру мәселелері де қозғалды.

Ақпараттық саясаттың ішкі саясаттың негізгі бағыттарының қатарында жеке аталуы қазіргі жағдайда ерекше маңызға ие.

Өйткені мемлекет қабылдаған шешімнің қоғамға қалай түсіндірілетіні, азаматтың ресми ақпаратқа сенімі және қоғамдағы әртүрлі пікірдің мемлекеттік институттарға қаншалықты жететіні саяси реформалардың тиімділігіне тікелей әсер етеді.

Бұл тұрғыдан Қазақстан Халық Кеңесінің міндеті де тек ақпарат тарату емес, қоғамнан шыққан ұсынысты мемлекеттік шешім деңгейіне жеткізетін кері байланыс тетігін қалыптастыру.

Редакция бұған дейін Халық Кеңесінің комитеттері қоғамнан түскен ұсынысты нақты шешімге қалай жеткізе алады деген мәселені арнайы саралаған болатын.

Президент қандай тапсырма берді?

Кездесу соңында Қасым-Жомарт Тоқаев конституциялық қағидаттар мен құндылықтар ұлттық болмыс пен қоғамдық мәдениеттің ажырамас бөлігіне айналуға тиіс екенін атап өтті.

Президент патриотизм, жауапкершілік, еңбекқорлық, бірлік және азаматтардың жасампаз мақсаттар жолында жұмылуын елді қарқынды дамытудың маңызды алғышарттары ретінде атады.

Мемлекет басшысы осы бағыттар бойынша бірқатар нақты тапсырма берді.

Бұл кездесудің Қазақстан Халық Кеңесі үшін де саяси мәні бар.

Өйткені Кеңестің бірінші сессиясында айтылған міндеттердің орындалуы Президентке берілген ресми есептің құрамына енді.

Ендігі өлшем – тапсырманың айтылғаны емес, орындалғаны.

Халық Кеңесі қоғамнан мәселе көтерсе, оның қай мемлекеттік органға жеткені, қандай шешім қабылданғаны және қандай нәтиже бергені көрінуі керек.

Өйткені жоғары конституциялық консультативтік органның салмағы отырыстар санымен емес, қоғамның үнін мемлекеттік шешімге айналдыра алуымен өлшенеді.

Дереккөз: Ақорда