Ерлан Қошанов: Әртүрлі пікір елді әлсіретпеуі керек
Қазақстан Халық Кеңесінің жұмысын бастауы – елдің саяси жаңғыру жолындағы маңызды кезеңдердің бірі. Бұл туралы Қазақстан Халық Кеңесінің төрағасы Ерлан Қошанов мәлімдеді, деп хабарлайды halyq-kenesi.kz ақпарат агенттігі.
Оның айтуынша, Мемлекет басшысы Қасым-Жомарт Тоқаев Халық Кеңесінің алдында сөйлеген сөзінде жаңа конституциялық органның міндеттерімен қатар, оның елдің саяси құрылымындағы орнын да айқындап берді.
«Қазақстан Халық Кеңесін құрудың артында соңғы жылдардағы Қазақстанды саяси жаңғыртудың ауқымды жолы тұр. Біз мемлекеттің түбегейлі трансформациясына куә болып отырмыз. Елде билік жүйесі өзгерді, мемлекеттік институттар жаңартылды, ашық диалог пен азаматтық жауапкершіліктің жаңа мәдениеті қалыптасып келеді», – деді Халық Кеңесінің төрағасы Ерлан Қошанов.
Ол қоғамда ел тағдырына етене араласу сезімі күшейіп, азаматтардың болып жатқан өзгерістерге сырттай бақылаушы емес, тікелей қатысушы ретінде қарай бастағанын атап өтті.
Оның пікірінше, осы үдерістің маңызды нәтижелерінің бірі – Қазақстан Халық Кеңесінің жұмысын бастауы.
«Халық Кеңесі» атауының мәні терең
Ерлан Қошанов Кеңес атауының өзінде үлкен мағына бар екенін атап өтті.
«Халық Кеңесі – халқымыздың шынайы болмысына, оның бірігу қабілетіне, күрделі мәселелерді талқылауға және уақыттың сын-тегеуріндеріне бірге жауап іздеуге жасалған үн қату. Бұл атаудан әр азаматқа жақын қарапайымдылықты да, ауқымды мемлекеттік идеяны да көруге болады», – деді ол.
Оның сөзінше, жалпыұлттық диалогтың жоғары конституциялық деңгейге көтерілуі мемлекет пен қоғам арасындағы өзара іс-қимылдың жаңа кезеңін білдіреді.
Бұл – азаматтардың түрлі пікірі, мүддесі мен өмірлік тәжірибесі ортақ шешім іздеудің негізіне айналатын алаң.
«Бізді ортақ ел, ортақ тағдыр, ортақ болашақ біріктіреді»
Халық Кеңесінің төрағасы Қазақстанның кең байтақ әрі көпқырлы мемлекет екенін атап өтті.
Елде әртүрлі өңірлер, буындар, кәсіп иелері, әлеуметтік топтар мен этномәдени дәстүрлер бар. Әр қауымдастықтың өз тәжірибесі, ерекшелігі мен көзқарасы қалыптасқан.
«Соның бәріне қарамастан, бізді ең бастысы – ортақ ел, ортақ тағдыр және ортақ болашақ біріктіреді», – деді Ерлан Қошанов.
Оның айтуынша, қоғамдағы әралуандық жікке бөлінудің себебі емес, елдің күш-қуаты мен өзара байытуының көзі болуы керек.
Осы тұрғыдан алғанда, Қазақстан Халық Кеңесі әртүрлі көзқарастар бірін-бірі жоққа шығармай, керісінше елдегі жағдайды жан-жақты бағалауға мүмкіндік беретін қоғамдық диалог алаңына айналуға тиіс.
Халық Кеңесінің басты құндылығы – адам
Ерлан Қошанов Кеңес қызметіндегі негізгі қағидаттардың бірі адам мен оның мүддесі болатынын айтты.
«Ең басты құндылық – адам. Дәл осы қағида Халық Кеңесі жұмысының мағыналық негізі болып, басты орын алады», – деді ол.
Сонымен бірге ол адамға қамқорлық тек мемлекеттік шешімдермен шектелмейтінін атап өтті.
Бұл ұғым адамның өзі өмір сүретін ортаға көзқарасынан, қоғамдық жауапкершілігінен және күнделікті мәдениетінен басталады.
Осы орайда ол «Таза Қазақстан» бастамасы мен «Заң мен тәртіп» қағидатына тоқталды.
«Біз құрмет, жауапкершілік пен заңдылық сырттан қойылатын талап емес, адамның ішкі нормасына айналатын жаңа қоғамдық мәдениетті қалыптастыру туралы айтып отырмыз», – деді Халық Кеңесінің төрағасы.
Оның пікірінше, Халық Кеңесі осы құндылықтарды жалпыұлттық деңгейде талқылап қана қоймай, олардың қоғам өмірінде нақты орнығуына ықпал ететін алаң болуы қажет.
«Қоғамдық диалогтың жаңа кезеңі басталды»
Ерлан Қошанов Қазақстанда қоғамдық диалогты дамытудың жаңа кезеңі басталғанын атап өтті.
Оның айтуынша, жүргізіліп жатқан саяси және институционалдық реформалардың түпкі мәні адамның өмір сапасы мен болашағына бағытталуы тиіс.
«Сайып келгенде, мемлекеттің тарихы ең алдымен өзгерістердің халқына қандай өмір сыйлағанымен өлшенеді», – деді ол.
Сөзінің соңында Қазақстан Халық Кеңесінің төрағасы Ерлан Қошанов Мемлекет басшысына білдірілген сенім үшін алғыс айтып, Халық Кеңесі институтының қалыптасуына үлес қосу үлкен жауапкершілік екенін атап өтті.
