Газ, ауыз су және жүз мыңдаған жұмыс орны: Тоқаев «Халықтық құрылыс» бастамасын ұсынды

Қазақстанның барлық өңірінде газ және таза ауыз су желілерін тарту, коммуналдық инфрақұрылымды жаңғырту және жүз мыңдаған адамды жұмыспен қамту көзделіп отыр. Президент Қасым-Жомарт Тоқаев Қазақстан халқына Жолдауында ел көлемінде жүзеге асырылатын ауқымды инфрақұрылымдық бастамаға «Халықтық құрылыс» деген атау беруді ұсынды. Мемлекет басшысының айтуынша, бұл жоба азаматтардың әл-ауқатын арттыруға, кәсіпкерлікті дамытуға және ұлттық экономиканы жандандыруға бағытталады. Үкімет жыл соңына дейін барлық аймақты қамтитын нақты жобалардың бастапқы тізімін әзірлеуге тиіс, деп хабарлайды halyq-kenesi.kz ақпарат агенттігі.
Президенттің сөзін өзгеріссіз ұсынамыз:
«Бұдан бөлек, тұрғын үй-коммуналдық шаруашылығы саласына қомақты қаржы бөлінеді. Көптеген елді мекендерге газ және таза ауыз су тартылады.
Үкімет жыл соңына дейін нақты жобалардың бастапқы тізімін әзірлейді. Бұл тізім барлық аймақты қамтуы керек.
Біз халқымыздың артып отырған зор үмітіне лайық болуымыз қажет.
Бұл жоспарымыз ел игілігін арттыруға арналып отыр, басқа астарлы ойымыз жоқ. Сондықтан осы үлкен құрылыс қозғалысына «Халықтық құрылыс» деген атау берсек, қарсылық болмас деп сенемін.
«Халықтық құрылыс» бағдарламасы азаматтардың әл-ауқатын арттыратын, кәсіпкерліктің өркендеуіне, дамуына, ұлттық экономиканы жандандыруға зор ықпал ететін төл тарихымыздағы ең үлкен инфрақұрылымдық жоба болмақ.
Аталған бастама жүз мыңдаған адамды жұмыспен қамтиды, оның игілігін тұтас халқымыз, әсіресе, өскелең ұрпақ көреді деп кәміл сенемін».
Тақырыпқа қатысты материалдар
- Бағдарлама бар, мәселе шешілмейді: Сүйентаева өңірлердегі түйінді Халық Кеңесіне шығармақ
- Жаңа жол тозды: Халық Кеңесіндегі сыннан кейін Үкімет реформа бастады
- Құрылыста жұмысшы зардап шексе, кім жауап береді? Халық Кеңесінде мердігерлердің міндетін нақтылау ұсынылды
- Өңірлердің үні Астанаға жете ме: Халық Кеңесі жаңа жұмыс кезеңіне кірісті


