«Қуатты қалалар – қуатты мемлекеттің негізі»: Тоқаев Үкіметке жаңа міндет қойды

Қазақстанның ірі қалалары енді нақты даму жоспарына сүйеніп, заманауи цифрлық технологиялар арқылы басқарылуға тиіс. Қала инфрақұрылымының цифрлық сыңарын әзірлеу, ресурстарды тиімді пайдалану және тұрғындарға қауіпсіз әрі жайлы орта қалыптастыру – Үкімет пен әкімдіктердің алдына қойылған жаңа міндеттер. Президент Қасым-Жомарт Тоқаев Қазақстан халқына Жолдауында қалалардың экономикалық өсім мен адами капиталды дамытудың негізгі орталығына айналғанын атап өтті. Мемлекет басшысы қалаларды дамыту ісі «Таза Қазақстан» тұжырымдамасымен тікелей байланысты екенін мәлімдеді, деп хабарлайды halyq-kenesi.kz ақпарат агенттігі.
Президенттің сөзін өзгеріссіз ұсынамыз:
«Біз ауыл-аймақтарды дамыту мәселесін әрдайым ерекше бақылауда ұстаймыз. Ауылдағы тұрғындардың лайықты өмір сүруі үшін барынша жағдай жасап отырмыз.
Алайда, қазір экономика, білім мен технологияның тірегі де, таланттарды шыңдайтын да негізгі қалалар екенін атап өткен жөн.
Сайып келгенде, қуатты қалалар қуатты аймақтардың, ал қуатты аймақтар күшті мемлекеттің негізін қалайды. Сондықтан әрбір ірі қаланың Үкімет бекіткен нақты орта және ұзақ мерзімдегі даму жоспары болуға тиіс.
Сонымен қатар қала ресурсын тиімді басқару үшін Үкімет әкімдіктермен бірлесіп, қала инфрақұрылымының цифрлық сыңарын көп ұзамай әзірлеуге тиіс.
Қалалардың қауіпсіз, жайлы, көрікті болуына басымдық, яғни приоритет ретінде қарай отырып, бұл істі аса маңызды мемлекеттік міндет деп қабылдау керек. Бұл – «Таза Қазақстан» жалпыұлттық тұжырымдамасына толық сай келетін талап.
Егер қала қарқынды дамитын болса, сол өңірдің экономикасы да өркендейді, адами әлеуеті де артады».
Тақырыпқа қатысты материалдар
- Бағдарлама бар, мәселе шешілмейді: Сүйентаева өңірлердегі түйінді Халық Кеңесіне шығармақ
- «Тазалықты айыппұлмен орната алмайсың»: Жандос Ақтаев билікке де талап қойды
- Өңірлердің үні Астанаға жете ме: Халық Кеңесі жаңа жұмыс кезеңіне кірісті
- Жаңа жол тозды: Халық Кеңесіндегі сыннан кейін Үкімет реформа бастады


